22 වැනි ආණ්ඩුක්‍රම ව්‍යවස්ථා සංශෝධනය සම්බන්ධයෙන් ඇතැම් පක්ෂ විරෝධතා සඳහා සහභාගී නොවූවත්, එම කාරණය සම්බන්ධයෙන් සමස්ත විපක්ෂයම එකඟතාවයකින් පසුවන බව ඒකාබද්ධ විපක්ෂයේ කැඳවුම්කරු, මහාචාර්ය ජී.එල්. පීරිස් මහතා ප්‍රකාශ කරයි. අද (29) පැවති මාධ්‍ය හමුවකදී අදහස් දක්වමින් ඒ මහතා කියා සිටියේ පසුගිය සැප්තැම්බර් 24 වැනි දින පාර්ලිමේන්තු සංකීර්ණය අසල පැවති විරෝධතාවයට ඇතැම් විපක්ෂ පක්ෂ නොපැමිණීම යනු 22 වැනි සංශෝධනය පිළිබඳව ඔවුන් වෙනස් මතයක සිටින බවක් නොපෙන්වන බවයි.
එහිදී අදහස් දැක්වූ හිටපු අමාත්‍ය දිලාන් පෙරේරා මහතා සඳහන් කළේ ඇතැම් විපක්ෂ මන්ත්‍රීවරුන් සීමිත දෘෂ්ටිකෝණයකින් කටයුතු කරන බවයි. ව්‍යවස්ථා සංශෝධනයට එරෙහිව විපක්ෂය තුළ මූලික එකඟතාවක් පවතින බවත්, ඉදිරියේදී ඒ සම්බන්ධයෙන් සාමූහිකව කටයුතු කිරීමට අපේක්ෂා කරන බවත් නායකයෝ මෙහිදී පෙන්වා දුන්හ.
