කෘතිම බුද්ධිය හෙවත් AI තාක්ෂණය හුදෙක් වැළඳගැනීම වෙනුවට ශක්තිමත් ප්රතිපත්ති, සදාචාරාත්මක රාමුවක් සහ සියලු දෙනා ඇතුළත් කරගත් පාලන පද්ධතියක් හරහා එහි අනාගතය මෙහෙයවීමට ශ්රී ලංකාව කටයුතු කළ යුතු බව අග්රාමාත්ය ආචාර්ය හරිනි අමරසූරිය මෙනෙවිය අවධාරණය කරයි. කොළඹ විශ්වවිද්යාලයේදී පැවැති රාජ්ය විශ්වවිද්යාල සඳහා වූ AI ප්රතිපත්ති රාමුව එළිදැක්වීමේ උත්සවයට ප්රධාන අමුත්තා ලෙස එක්වෙමින් අග්රාමාත්යවරිය පෙන්වා දුන්නේ තාක්ෂණය අපට තේරුම් ගත හැකි වේගයට වඩා වේගයෙන් වෙනස් වන බැවින් ඒ සඳහා ශක්තිමත් පාලන පද්ධතියක අවශ්යතාවය පවතින බවයි.
විශ්වවිද්යාල ප්රතිපාදන කොමිෂන් සභාව සහ ශ්රී ලංකාවේ අමෙරිකානු තානාපති කාර්යාලය එක්ව ක්රියාත්මක කළ මෙම වැඩපිළිවෙළ මගින් රාජ්ය විශ්වවිද්යාල තුළ AI තාක්ෂණය වගකීම් සහගත ලෙස සහ සදාචාරාත්මකව භාවිත කිරීම සඳහා මගපෙන්වීම් සිදු කරනු ලබයි. මෙහිදී අග්රාමාත්යවරිය විශේෂයෙන් සඳහන් කළේ සමාජ විද්යා සහ මානුෂීය විද්යා වැනි ක්ෂේත්ර සඳහා AI තාක්ෂණය මගින් එල්ල වන අභියෝග හඳුනා ගැනීම වැදගත් බවයි. එමෙන්ම මෙම නව තාක්ෂණය හරහා අධ්යාපන පද්ධතිය තුළ පවතින අසමානතා තවදුරටත් ගැඹුරු නොවිය යුතු බවත්, භාෂා බාධක ජය ගැනීමට සහ ආබාධිත සිසුන්ට සහාය වීමට මෙම තාක්ෂණය යොදාගත යුතු බවත් ඇය පෙන්වා දුන්නාය.
මෙම ප්රතිපත්ති රාමුව ක්රියාත්මක කිරීමේදී ශාස්ත්රීය ප්රජාව සහ සිසුන් සමඟ අඛණ්ඩව සාකච්ඡා කරමින් ඔවුන්ගේ අදහස් ලබා ගැනීම අත්යවශ්ය වන බව ද මෙහිදී අවධාරණය කෙරිණි. ලෝකයේ සිදුවන තාක්ෂණික වෙනස්කම්වලට හුදෙක් ප්රතිචාර දැක්වීම වෙනුවට දේශීය විශේෂඥ දැනුම වර්ධනය කරමින් පෙරගමන්කරුවෙකු ලෙස කටයුතු කිරීමට ශ්රී ලංකාව සූදානම් විය යුතුය. මෙම නව ප්රතිපත්ති රාමුව එළිදැක්වීම ශ්රී ලංකාවේ උසස් අධ්යාපන ක්ෂේත්රය නවීන තාක්ෂණය සමඟ වගකීම් සහගතව ඉදිරියට යාමට තැබූ තීරණාත්මක පියවරක් ලෙස සැලකේ.
