‘දිට්වා’ සුළි කුණාටුව හේතුවෙන් ආපදාවට පත් ජනතාව වෙනුවෙන් අධ්යාපනය, සෞඛ්යය, ජලය සහ සනීපාරක්ෂාව ඇතුළු අත්යවශ්ය සේවාවන් කඩිනමින් යථා තත්ත්වයට පත් කිරීම සඳහා පිහිටුවා ඇති ‘Rebuilding Sri Lanka’ කාර්යසාධක බලකායේ විශේෂ අනු කමිටු රැස්වීමක් ඊයේ (19) පස්වරුවේ පවත්වා තිබේ. ග්රාමීය සංවර්ධන, සමාජ ආරක්ෂණ හා ප්රජා සවිබලගැන්වීම් අමාත්ය මහාචාර්ය උපාලි පන්නිල මහතාගේ සභාපතීත්වයෙන් තාක්ෂණය ඔස්සේ පැවති මෙම සාකච්ඡාවේදී එක් එක් අමාත්යාංශ මගින් මේ වන විට ක්රියාත්මක කරනු ලබන වැඩපිළිවෙළවල් පිළිබඳව දීර්ඝ වශයෙන් අවධානය යොමු විය.
ආපදා සහන කඳවුරු නිසි ප්රමිතියකින් පවත්වාගෙන යාම, රෝග ව්යාප්තිය වැළැක්වීම සඳහා වන සෞඛ්ය උපදෙස් ක්රියාත්මක කිරීම සහ විපතට පත් වූවන් හා දේපළ හානි පිළිබඳ නිවැරදි දත්ත රැස් කිරීම කෙරෙහි මෙහිදී විශේෂ අවධානයක් යොමු කෙරිණි. මේ යටතේ ජාතික ක්රමසම්පාදන දෙපාර්තමේන්තුව, සෞඛ්ය හා ජනමාධ්ය අමාත්යාංශය, අධ්යාපන අමාත්යාංශය මෙන්ම කාන්තා හා ළමා කටයුතු අමාත්යාංශය යන ආයතන ඒකාබද්ධව සිදුකරන පසුවිපරම් කටයුතු පිළිබඳව ද මහාචාර්ය උපාලි පන්නිල මහතා විමසා බැලීය.
අදාළ කමිටුව සඳහා සෞඛ්ය අමාත්ය වෛද්ය නලින්ද ජයතිස්ස, ඉදිකිරීම් හා ජලසම්පාදන අමාත්ය වෛද්ය සුසිල් රණසිංහ ඇතුළු අමාත්යාංශ ලේකම්වරුන්, ආපදා කළමනාකරණ මධ්යස්ථානයේ සහ ජාතික ගොඩනැගිලි පර්යේෂණ සංවිධානයේ ප්රධානීන් මෙන්ම සිවිල් සමාජ නියෝජිතයන් ද එක්ව සිටියහ. ජනාධිපති අතිරේක ලේකම් ජේ. ආර්. සී. ජයතිලක මහතා මෙම කමිටුවේ ලේකම්වරයා ලෙස කටයුතු කරයි.
