එළඹෙන අගෝස්තු 10 වන දින ආරම්භ කිරීමට නියමිතව ඇති 2026 අ.පො.ස. උසස් පෙළ (A/L) විභාගය අවම වශයෙන් මාස දෙකක කාලයකින් කල් දමා දෙන ලෙස විභාගයට පෙනී සිටීමට නියමිත සමස්ත ශිෂ්ය ප්රජාව නියෝජනය කරමින් සිසුන් පිරිසක් අධ්යාපන බලධාරීන්ගෙන් සහ විභාග දෙපාර්තමේන්තුවෙන් හදිසි හා බලවත් ඉල්ලීමක් කර සිටිති. පසුගිය වසරවල කොවිඩ් වසංගතය සහ රටේ පැවති විවිධ අර්බුද හේතුවෙන් අඩාල වූ විභාග කාලසටහන යළි යථා තත්ත්වයට පත් කිරීම සඳහා රජය ගෙන ඇති කඩිනම් වැඩපිළිවෙළ හේතුවෙන් තමන් දැඩි අධ්යයන පීඩනයකට ලක්ව ඇති බව සිසුන් පෙන්වා දෙති.
සිසුන් සිය නිල ඉල්ලීම මඟින් අවධාරණය කර සිටින්නේ, 2025 උසස් පෙළ විභාගයේ ප්රතිඵල පසුගිය මාර්තු 31 වන දින නිකුත් කිරීම හේතුවෙන්, එම ප්රතිඵල මත පදනම්ව මෙවර විභාගයට නැවත පෙනී සිටීමට (Repeat Applicants) බලාපොරොත්තු වන සිසුන්ට විභාගය සඳහා සූදානම් වීමට ඉතිරිව ඇත්තේ මාස හතරකට ආසන්න ඉතා කෙටි කාලයක් පමණක් බවයි. එලෙසම, 2026 වසරේදී පළමු වරට විභාගයට පෙනී සිටින (Fresh Applicants) සිසුන්ගේ පාසල් ආරම්භක දින වරින් වර වෙනස් වීම, දිවයිනට බලපෑ අයහපත් කාලගුණික තත්ත්වයන්, අනපේක්ෂිත පාසල් නිවාඩු සහ බාහිර බාධාවන් රැසක් හේතුවෙන් ඔවුන්ගේ නිල විෂය නිර්දේශයන් ආවරණය කරගැනීමට පවා මෙතෙක් නිසි අවස්ථාවක් ලැබී නොමැති බව ඔවුහු පවසති. නිල දත්ත සටහන්වලට අනුව පෙර පැවති කණ්ඩායම්වලට විභාගය වෙනුවෙන් මාස 27 සිට 31 දක්වා දීර්ඝ කාල සීමාවන් හිමි වුවද, 2026 ස්ථාවර කාලසටහන (Fixed Schedule) යටතේ මෙවර සිසුන්ට හිමිව ඇත්තේ මාස 21ක වැනි අවම කාලයක් පමණි.
තමන් කිසිදු අසාධාරණ වාසියක් ලබා ගැනීමට අපේක්ෂා නොකරන බවත්, සමස්ත විෂය නිර්දේශය නිසි පරිදි අවසන් කර ප්රමාණවත් පුනරීක්ෂණ (Revision) කටයුතු සිදු කිරීම සඳහා පමණක් සාධාරණ කාලයක් ඉල්ලා සිටින බවත් සිසුන් ප්රකාශ කරති. මේ හේතුවෙන් දරුවන්ගේ මානසික සෞඛ්යය සහ අනාගතය පිළිබඳව සලකා බලා, අගෝස්තු 10 දින පැවැත්වීමට නියමිත විභාගය ඔක්තෝබර් මාසය දක්වා මාස දෙකකින් කල් දැමීමට කඩිනම් පියවරක් ගන්නා ලෙස සිසුන් සහ දෙමාපියන් අධ්යාපන අමාත්යවරයාගෙන් දැඩිව ඉල්ලා සිටිති.
