සුඩානයේ පවතින ජීවන වියදම් අර්බුදය හමුවේ ඉන්ධන හිඟය සහ මිල ඉහළ යාම හේතුවෙන් දෛනික ආදායම මත යැපෙන සේවකයන්ගේ ජීවිකාව පවත්වාගෙන යාම වඩාත් දුෂ්කර වී තිබේ.
පෝර්ට් සුඩාන් නගරයේ ෂගාර් ප්‍රදේශයේ සිට නගර මධ්‍යයට මගීන් ප්‍රවාහනය කරන 60 හැවිරිදි අෂාරි මොහොමඩ් ද එම අර්බුදයට මුහුණ දී සිටී. ඔහු උදෑසන 6 සිට රාත්‍රී 9 දක්වා කුඩා බස් රථයක් ධාවනය කළද, ඉන්ධන ලබාගැනීමට දිගු වේලාවක් පෝලිම්වල රැඳී සිටීමට සිදුවීම නිසා ආදායම අහිමි වන බව පවසයි.
ඔහුගේ බස් රථයට දිනකට පෙට්‍රල් ගැලුම් තුනක් පමණ අවශ්‍ය වන අතර, ඒ සඳහා සුඩාන පවුම් 105,000ක් පමණ වැය වන බව ඔහු සඳහන් කරයි. ඇතැම් අවස්ථාවල ඉන්ධන ලබාගැනීමට පැය පහකට වැඩි කාලයක් පෝලිමේ සිටීමට සිදුවන අතර, තම වාරය පැමිණීමට පෙර ඉන්ධන අවසන් වන අවස්ථා ද ඇති බව ඔහු පවසයි.
වාර්තාවට අනුව, ගැලුමක පෙට්‍රල් මිල ගෙසිරා ප්‍රාන්තයේ සුඩාන පවුම් 40,000ක් පමණ වන අතර පෝර්ට් සුඩාන්හි එය පවුම් 35,000ක් පමණ වේ.
ඉන්ධන සඳහා වැයවන මුදල සහ පෝලිම්වල ගත කරන කාලය හේතුවෙන් ප්‍රවාහන ගාස්තුවලින් වාහන වියදම් හා පවුලේ දෛනික අවශ්‍යතා පියවා ගැනීම දුෂ්කර වී ඇති බව අෂාරි මොහොමඩ් අල් ජසීරා වෙත පවසා තිබේ.
