යේමනයේ හූති සන්නද්ධ කණ්ඩායමෙන් එල්ල වන මිසයිල හා ඩ්‍රෝන ප්‍රහාරවලින් සෞදි අරාබිය ආරක්ෂා කිරීම සඳහා රාජකීය ගුවන් හමුදාවේ (RAF) Typhoon ප්‍රහාරක යානා යෙදවීමට බ්‍රිතාන්‍යය තීරණය කර තිබේ.
ඔක්තෝබර් 20 වැනිදා නිකුත් කළ නිවේදනයකින් බ්‍රිතාන්‍ය ආරක්ෂක අමාත්‍යාංශය සඳහන් කර ඇත්තේ, සෞදි නගර සහ අත්‍යවශ්‍ය ජාතික යටිතල පහසුකම් ගුවන් ප්‍රහාරවලින් ආරක්ෂා කිරීම සඳහා මෙම යානා ආරක්ෂක මෙහෙයුම්වලට යොදවන බවයි. එම යානා හූති කණ්ඩායමට එරෙහිව සෘජු ප්‍රහාර එල්ල කිරීමට භාවිත නොකරන බව ද අමාත්‍යාංශය අවධාරණය කර තිබේ.
මෙම තීරණය ගෙන ඇත්තේ සෞදි අරාබියට එරෙහිව හූති කණ්ඩායමෙන් එල්ල වන මිසයිල හා ඩ්‍රෝන ප්‍රහාර ඉහළ යාමත් සමඟය. රියාද්හි කිං ඛාලිඩ් ජාත්‍යන්තර ගුවන්තොටුපළ ඇතුළු සිවිල් හා අත්‍යවශ්‍ය යටිතල පහසුකම් ඉලක්ක කරගත් ප්‍රහාර සම්බන්ධයෙන් බ්‍රිතාන්‍යය දැඩි අවධානය යොමු කර තිබේ.
Typhoon යානා යෙදවීමට අමතරව, සෞදි අරාබිය තුළ ආරක්ෂක උපකරණ ප්‍රවාහනය සඳහා RAF A400M ප්‍රවාහන යානයක් ලබාදීමටත්, සෞදි හමුදා නිලධාරීන්ට සහාය වීම සඳහා බ්‍රිතාන්‍ය හමුදා උපදේශකයන් යෙදවීමටත් සැලසුම් කර ඇත. සෞදි ආරක්ෂක ගුවන් මෙහෙයුම් සඳහා ලබාදෙන ගුවනේදී ඉන්ධන පිරවීමේ සහාය ද තවත් දින 90කින් දීර්ඝ කිරීමට තීරණය කර තිබේ.
හූති කණ්ඩායම යේමනයේ ජාත්‍යන්තරව පිළිගත් රජය සමඟ ගැටුමක නිරතව සිටින අතර, එම රජයට සෞදි අරාබියේ සහාය හිමි වේ. කෙසේ වෙතත්, යේමනයේ ගැටුමට දිගුකාලීන විසඳුමක් ලබාගැනීම සඳහා රාජ්‍යතාන්ත්‍රික හා එක්සත් ජාතීන්ගේ මැදිහත්වීම අවශ්‍ය බව බ්‍රිතාන්‍ය රජය ද සඳහන් කර තිබේ.
