රුසියාව සහ යුක්‍රේනය අතර පවතින යුද්ධය අවසන් කිරීමේ රාජ්‍යතාන්ත්‍රික ප්‍රයත්නවල කොටසක් ලෙස යුක්‍රේන ජනාධිපති වොලොදිමීර් සෙලෙන්ස්කි සහ ඇමරිකානු විශේෂ නියෝජිත ස්ටීව් විට්කොෆ් ඇතුළු පිරිසක් නෝර්වේ ඔස්ලෝ නුවරදී සාකච්ඡා සඳහා එක්වීමට නියමිතය.
නෝර්වේ අගමැති ජෝනාස් ගාර් ස්ටෝරේ සහ ෆින්ලන්ත ජනාධිපති ඇලෙක්සැන්ඩර් ස්ටබ් ද මෙම සාකච්ඡාවලට සහභාගී වෙති. ඇමරිකානු විශේෂ නියෝජිත ජෙරඩ් කුෂ්නර් දුරස්ථව සාකච්ඡාවලට එක්වන බව වාර්තා වේ.
සාකච්ඡාවලට පෙර සෙලෙන්ස්කි, ඇමරිකානු රාජ්‍ය ලේකම් මාර්කෝ රුබියෝ සමඟ මිසයිල ප්‍රතිහරන පද්ධති, බුද්ධි තොරතුරු හුවමාරුව සහ ස්පේස්එක්ස් සමාගමේ ස්ටාර්ෂීල්ඩ් චන්ද්‍රිකා සන්නිවේදන සේවාව සම්බන්ධයෙන් සාකච්ඡා කළ බව සඳහන් කර තිබේ.
රුසියානු මිසයිල ප්‍රහාර පිළිබඳ පූර්ව අනතුරු ඇඟවීම් සහ යුක්‍රේනයට අවශ්‍ය පැට්‍රියට් ගුවන් ආරක්ෂක මිසයිල සැපයීම සම්බන්ධයෙන් ඇමරිකාවේ සහාය ලබාගැනීම යුක්‍රේනයේ ප්‍රධාන අපේක්ෂාවන් අතර වේ. මේ සම්බන්ධයෙන් ඇමරිකාව ගන්නා ඉදිරි ක්‍රියාමාර්ග පිළිබඳව නිශ්චිත එකඟතාවක් ප්‍රකාශයට පත් කර නොමැත.
මේ අතර, යුක්‍රේනයට එරෙහි රුසියානු ප්‍රහාර අඛණ්ඩව සිදුවන පසුබිමක මෙම සාකච්ඡා පැවැත්වේ. යුද්ධය අවසන් කිරීම සඳහා ඇමරිකාව, යුක්‍රේනය සහ යුරෝපීය රටවල් අතර රාජ්‍යතාන්ත්‍රික එකඟතාවක් ඇති කරගැනීම මෙම හමුවේ ප්‍රධාන අරමුණ වී තිබේ.
