විපක්ෂය නොකරපු දේවල් අපි කරනවා – රාජ්‍ය අමාත්‍ය ලාන්සා
විපක්ෂය පසුගිය අවුරුදු පහටම කළ සංවර්ධනය අපි ලබන වසර තුළදී සිදු කරන බව ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලාන්සා මහතා පවසයි.
රාජ්‍ය අමාත්‍ය නිමල් ලාන්සා මහතා මේ බව පැවුසවේ අද (12) දින කටාන, මඩවල අරඹෙ මාර්ගය හා කටියල ගම මැද මාර්ගය කාපට් අතුරා සංවර්ධනය කිරීමේ අවස්ථාවට සහභාගි වෙමිනි.
එහිදී වැඩිදුරටත් අදහස් දැක්වූ රාජ්‍ය අමාත්‍ය නිමල් ලාන්සා මහතා,“විපක්ෂය කොළඹට වෙලා, ඒසී කාමර වලට වෙලා ගමට යන්නෙ නැතිව ප්‍රකාශ නිකුත් කරනවා. අපි සෑම ග්‍රාම සේවා වසකම සංවර්ධන කටයුතු ක්‍රියාත්මක කර තිබෙනවා. ජනතාවට අවශ්‍යය මාර්ග, විදුලිය, පානීය ජලය, නිවාස ඇතුළු යටිතල පහසුකම් ලබා දීමට අවශ්‍යය කටයුතු ක්‍රියාත්මක කර තිබෙනවා. ජනාධිපතිවරයා සෞභාග්‍යයේ දැක්ම ප්‍රතිපත්ති ප්‍රකාශනයෙන් ජනතාවට ලබාදුන් පොරොන්දු ඉටු කරලීම වගේම මෙවර අයවැයෙන් ජනතාවට ලබාදුන් පොරොන්දු ඉටු කිරීමට අපි කටයුතු කරනවා. ඒ සදහා වන පලමු අයවැය තමා මෙවර සම්මත කර ගත්තෙ. කොවිඩ් 19 වසංගත තත්ත්වයට සීයට සීයක් මෙතෙක් බෙහෙතක් හොයාගෙන නැහැ. එංගලන්තය පවා ලබාදුන් එන්නතේ අතුරු ආබාධ ඇති බව හදුනගෙන තිබෙනවා. ඒ වගේ තත්ත්වයකදී ලංකාවේ කවුරුහරි කෙනෙක් අලුත් දෙයක් හොයාගත්තාම ඒකට අකුල් හෙලන අය තමා විපක්ෂයේ ඉන්නේ. අපි ඒ දේවල් හොදද නරකද කියලා හොයලා බලන්න ඕනේ. එහෙම නැතිව දේශීය නිෂ්පාදන හෝ වෛද්‍යවරු වට්ටන එක නෙමේ කරන්න ඕනේ. ලෝකයම මේ සදහා එන්නතක් සොයා ගැනීමට කටයුතු කරන වේලාවක ලංකාවේ කවුරුහරි දෙයක් හොයා ගන්නවනම් ඒ දේට සහය දෙන්න ඕනේ. නැතිව කඩාකප්පල් කරන එක අපේ වැඩපිළිවෙල නොවන බව රාජ්‍ය අමාත්‍ය නිමල් ලාන්සා මහතා වැඩිදුරටත් පැවසීය.