මරදාන සහිරා විද්‍යාලය සහ අම්බලන්ගොඩ ශ්‍රී දේවානන්ද විද්‍යාලය අතර මරදානේදී පැවති වයස අවුරුදු 19න් පහළ දෙවන කාණ්ඩයේ ‘ඒ’ සීමිත ඕවර ක්‍රිකට් තරගයෙන් කඩුලු 8ක දැවැන්ත ජයක් වාර්තා කිරීමට සහිරා ක්‍රීඩකයෝ සමත්වීමත් සමඟ, ඔවුන් මෙවර තරගාවලියේ අර්ධ අවසන් පූර්ව වටය සඳහා සුදුසුකම් ලබා ගැනීමට සමත්ව ඇත. පළමුව පන්දුවට පහදුන් දේවානන්ද කණ්ඩායම පන්දු යවන්නන්ගේ විනයගරුක ප්‍රහාරය හමුවේ ඕවර 34.2කදී ලකුණු 99කට සීමා වූ අතර, පිළිතුරු ඉනිම ක්‍රීඩා කළ සහිරා විද්‍යාලය ඕවර 25.2කදී කඩුලු 2ක් පමණක් දැවී ලකුණු 102ක් ලබා ගනිමින් තම සිව්වන අඛණ්ඩ ජයග්‍රහණය ඉතා විචක්ෂණශීලීව තහවුරු කර ගත්තේය.
පසුගිය වාර කිහිපය තුළ යම් පසුබෑමකට ලක්ව සිටි හිටපු පළමු පෙළ පාසල් ක්‍රිකට් කණ්ඩායමක් වන සහිරා විද්‍යාලය මෙවර සමස්ත ව්‍යුහයම ශක්තිමත් කරමින් කීර්තිමත් ප්‍රවීණ පුහුණුකරු දිනේෂ් වීරසිංහගේ මඟපෙන්වීම යටතේ ලැබූ මෙම විශිෂ්ට ප්‍රගතිය, පාසල් ක්‍රිකට් ක්‍රීඩාවේ ආයතනික කළමනාකරණයේ සහ නිසි සැලසුම්කරණයේ සැබෑ ප්‍රතිඵල මනාව පෙන්නුම් කරයි. මස්වූත් ප්‍රමුඛ පන්දු යවන්නන්ගේ දක්ෂතා මෙන්ම ආරම්භක පිතිකරු ඉජාස් අහමඩ් සහ හිම්සර හේෂාන්ගේ වගකීම්සහගත පිතිහරඹය මෙම අපරාජිත ගමනට ප්‍රබල රුකුලක් වූ අතර, පිළියන්දල, කළුතර සහ හික්කඩුව ප්‍රමුඛ ප්‍රබල විද්‍යාල රැසක් පරාජය කරමින් ඔවුන් පෙන්නුම් කළ ස්ථාවර දක්ෂතා පාසල් ක්‍රීඩා ක්ෂේත්‍රයේ දැඩි කතාබහට ලක්ව තිබේ.
මෙම අපරාජිත ජයග්‍රහණයත් සමඟ ඉදිරියේදී මාතර ශ්‍රී රාහුල විද්‍යාලයට එරෙහිව පැවැත්වෙන අවසන් ලීග් තරගයට සහ ඊළඟට උදාවන තීරණාත්මක දෙදින ක්‍රිකට් තරගාවලියට මුහුණ දීම සඳහා සහිරා කණ්ඩායම මේ වන විටත් දැඩි මානසික හා තාක්ෂණික සූදානමක පසුවේ. නව පුහුණුකාරීත්වය යටතේ ඉහළම අංශයට යළි උසස්වීම් ලැබීමේ අරමුණින් ඉදිරියට අඩක් තබා ඇති සහිරා ක්‍රීඩකයෝ, ක්‍රීඩා සමාජ සහ පාසල් ව්‍යුහය තුළ තම පාසලේ ඓතිහාසික ක්‍රිකට් අභිමානය යළි ඔප්නංවාලීමට සමත් වනු ඇති බවට ක්‍රීඩා දැඩි විශ්වාසයක් පළ කරති.
