අබිරහස් ලෙස මියගිය ශ්රීලන්කන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ මරණයට අදාළ මහෙස්ත්රාත් පරීක්ෂණය අද (12) කොළඹ කොටුව මහෙස්ත්රාත් පසන් අමරසේන මහතා ඉදිරියේදී පවත්වනු ලැබීය. එහිදී කොළඹ අපරාධ කොට්ඨාශය විසින් ඉදිරිපත් කළ කරුණු සලකා බැලූ අධිකරණය විමර්ශන සඳහා අවශ්ය වැදගත් නියෝග කිහිපයක් නිකුත් කළේය.
මරණකරුගේ ජංගම දුරකථනය ‘Face ID’ තාක්ෂණයෙන් අගුළු දමා ඇති බැවින් එය විවෘත කර දත්ත ලබාගැනීම සඳහා නිෂ්පාදිත සමාගම හෝ සුදුසු ආයතනයක් වෙත යොමු කිරීමට අධිකරණය අවසර ලබා දුන්නේය. මීට අමතරව මරණකරුගේ ශරීරයෙන් ලබාගත් ලේ සාම්පල් දෙකක්, සිද්ධිය වූ ස්ථානයේ තිබී සොයාගත් ගෙල බැඳි පටිය සහ හඳුනා නොගත් ඖෂධ වර්ග ද වැඩිදුර පරීක්ෂණ සඳහා රජයේ රස පරීක්ෂකවරයා වෙත යොමු කිරීමට නියමිතය.
මෙම මහෙස්ත්රාත් පරීක්ෂණයේදී හිටපු ක්රිකට් ක්රීඩක අරවින්ද ද සිල්වා සහ ඔහුගේ බිරිඳ සාක්ෂි ලබාදුන් අතර වැඩිදුර සාක්ෂි සටහන් කර ගැනීම ලබන 14 වනදා දක්වා කල් තැබීමට මහෙස්ත්රාත්වරයා නියෝග කළේය.
