ලංකාවේ ආපදා කළමනාකරණය ප්‍රවර්ධනය කිරීම සඳහා නෙදර්ලන්ත රජය ලබා දී තිබූ සුඛෝපභෝගී වාහනයක් සිය පෞද්ගලික පරිහරණය සඳහා යොදාගැනීමෙන් හිටපු අමාත්‍ය ඒ. එච්. එම්. ෆවුසි මහතා සමාන ලෙස සැලකීමේ මූලික අයිතිවාසිකම සහ මහජන භාර මූලධර්මය කඩ කර ඇතැයි තීන්දු කළ ශ්‍රේෂ්ඨාධිකරණය, ඔහුට වන්දි වශයෙන් රුපියල් ලක්ෂ හැට හයක මුදලක් ඒකාබද්ධ අරමුදලට ගෙවන ලෙස අද (29) නියෝග කළේය. ශ්‍රී ලංකා වාණිජ මණ්ඩලයේ හිටපු සභාපති චන්ද්‍රා ජයරත්න මහතා ගොනු කර තිබූ මූලික අයිතිවාසිකම් පෙත්සමක් විභාග කිරීමෙන් අනතුරුව අගවිනිසුරු ප්‍රීතිපද්මන් සූරසේන, ජනක් ද සිල්වා සහ අර්ජුන ඔබේසේකර යන විනිසුරු මඩුල්ල විසින් මෙම තීන්දුව ප්‍රකාශයට පත් කරන ලදී.
මෙම නියෝගයට අමතරව, අවභාවිත කළ වාහනයේ ඡායාරූපයක් සමඟ සිද්ධිය සම්බන්ධයෙන් භාෂා තුනෙන්ම පිටු බාගයක ප්‍රසිද්ධ පුවත්පත් දැන්වීමක් පළ කර සමාව ඉල්ලා සිටින ලෙසද ශ්‍රේෂ්ඨාධිකරණය හිටපු අමාත්‍යවරයාට වැඩිදුරටත් නියෝග කර ඇත. මීට පෙර කොළඹ මහාධිකරණය හමුවේ මෙම නඩුව විභාග වූ අවස්ථාවේදී වරද පිළිගැනීම හේතුවෙන් ඔහුට වසර දහයකට අත්හිටවූ බරපතල වැඩ සහිත වසර දෙකක සිර දඬුවමක් සහ රුපියල් ලක්ෂ 4ක දඩ මුදලක් ද නියම වී තිබිණි.
