ඉන්දිරා පිළිකා භාරය කොළඹ මහ නගර සභාව, ශ්‍රී ලංකා පිළිකා රෝග විද්‍යා පීඨය, පිළිකා ශල්‍ය වෛද්‍යවරුන්ගේ සංගමය, ශ්‍රී ලංකා පිළිකා සංගමය එක්ව පියයුරු පිළිකාව සම්බන්ධයෙන් කාන්තාවන් දැනුවත් කිරීම මූලික අරමුණ කරගෙන කොළඹ මහ නගර සභාව රෝස පැහැයෙන් ආලෝකමත් කිරීම අද (25) නගරාධිපතිනී රෝසී සේනානායක මහත්මියගේ ප්‍රධානත්වයෙන් කොළඹ මහ නගර සභා පරිශ්‍රයේදී සිදු කෙරිණි.

ඔක්තෝම්බර් මාසය පියයුරු පිළිකා පිළිබඳ දැනුවත් කිරීම හා වැළැක්වීම පිළිබඳ මාසයයි. ලෝක සෞඛ්‍ය සංවිධානය විසින් ඔක්තෝම්බර් මාසය පියයුරු පිළිකා මාසය හැටියටත්, පිළිකා මර්ධනය කිරීම හා පිළිකාවන් සම්බන්ධව ජනතාව දැනුවත් කිරීමේ මාසය හැටියටත් හදුන්වා දී තිබෙනවා.

එහිදී අදහස් දැකුවූ ගරු නගරාධිපතිවරිය, ” පියයුරු පිළිකාව සම්බන්ධයෙන් කාන්තාවන් දැනුවත් වීම තුළින් බොහෝ සෞඛ්‍ය ගැටළු නිරාකරණය කර ගැනිමට පුළුවන් වගේම එයින් වැළකි සිටීමට පුළුවන්. පියයුරු පිළිකාවක් වැළදුන දියණිය, සහෝදරිය, මව, මිත්තණිය, භාර්යාව සිටින පවුලක් ඒ රෝගය හේතු කරගෙන බොහෝ ලෙස පීඩාවට පත් වීමට පුළුවන්. ලංකාවේ සෑම වසරකම කාන්තාවන් 4000 කට ආසන්න සංඛ්‍යාවක් පියයුරු පිළිකාවෙන් පීඩා විදින බවත්,සෑම දිනකම කාන්තාවන් 12 කට ආසන්න සංඛ්‍යාවක් පියයුරු පිළිකාවන්ට ගොදුරු වන බවත් මේ වන විට පියයුරු පිළිකාවට සම්බන්ධ මරණ 02 ක් වාර්තා වී තිබෙන බවත් සොයා ගත් දත්ත අතර වෙනවා.

පියයුරු පිළිකාව පිළිබඳව දැනුවත් කිරීම සඳහා මුළු ලේකයේම සුවිශේෂී වූ ස්මාරක, ගොඩනැගිලි, ස්ථානයන් රෝස පැහැයෙන් බබලවන්න කටයුතු කරනවා. මේ හේතුව මූලික කරගෙන තමයි වෛද්‍ය ඉන්දිරා ජයසුරිය මහත්මියගේ ඉල්ලීම මත 2020 වර්ෂයේ දී මේ පෞරාණික ගොඩනැගිල්ල අපි රෝස පැහැයෙන් ආලෝකමත් කරන්න කටයුතු කලේ. මින් ඉදිරියට සෑම වසරකම කොළඹ මහ නගර සභාව රෝස පැහැයෙන් ආලෝකමත් කර කාන්තාව පමණක් නෙවෙයි මුළු සමාජයම පියයුරු පිළිකාව සම්බන්ධයෙන් දැනුවත් කරිමට කටයුතු කරනවා. ඒ මඟින් සමාජයේ පියයුරු පිළිකාව සම්බන්ධයෙන් පවතින බිය නැති කර පියයුරු පිළිකාවෙන් වැළකී සිටින්නේ කෙසේද යන්න සමාජයම දැනුවත් කල යුතුයි.

කෙසේ නමුත් අවුරුදු 20 ට වැඩි සෑම කාන්තාවක්ම මසකට වරක් සිය පියයුරු ස්වයං පියයුරු පරීක්ෂාවට ලක්කර බැලීම ඉතා උචිතයි. එසේ නොවෙනම් සුවනාරී සායනයකට හෝ සුව දිවි සායනයකට ගොස් පරීක්ෂාවට ලක් කර ගැනීම ඉතාමත් වැදගත්. ස්පර්ශ කිරීම ( Touch ), නිරීක්ෂණය කිරීම ( Look ), පරීක්ෂා කිරීම ( check ) යන වචන තුන කාන්තාවන් විසින් හදවතේ තබාගෙන කටයුතු කිරීම ඉතාමත් වැදගත් කරුණක්.අද මේ සම්බන්ධයෙන් උපදෙස් ලබා දිමට බොහෝ සෞඛ්‍ය ආයතන ද බැදී සිටිනවා.

මම හිතන්නේ මේ පිළිබඳව අපි පාසල් පද්ධතිය තුළින් සමාජය දැනුවත් කල යුතුයි. දරුවන් දැනුවත් කල යුතුයි. නිට්ටාවටම සුව කල හැකි රෝගයක් හේතු කරගෙන කාන්තාවන් අපහුතාවයට පත් වෙනවානම් අපේ සෞඛ්‍ය අංශය කොච්චර දියුණු වුවත්, වැඩක් වන්නේ නැහැ. අධ්‍යාපනය සෞඛ්‍ය අංශ වලින් ගත්තාහම අපි ඉතාමත් ඉදිරියෙන් සිටින රටක්.අපේ සාක්ෂරතාවය 93] 94] ක් පමණ වෙනවා.

අපේ ස්ත්‍රි පුරුෂ සමාජ මට්ටම සමතුලිත මට්ටමක පතිනවා. පියයුරු පිළිකාව සම්බන්ධයෙන් අපේ රටේ කාන්තාවන් මරණයට පත් වෙනවා නම් මම දකින්නේ අපි ආපස්සට ගිය රටක් හැටයටයි.
මේ නගර සභා ගොඩනැගිල්ල රෝස පැහැයෙන් බබලවා සියලුම දෙනා දැනුවත් කරනවා වගේම මම ඉල්ලීමක් කරනවා ලංකාවේ සෑම නගරයක්ම රෝස පැහැයෙන් ආලෝකමත් කර කාන්තාවන් දැනුවත් කිරීමට කටයුතු කරමු කියලා. අපි එතැනට යොමු විය යුතුයි. අපිට එතැනට යොමු වීමට ශක්තිය ධෛර්ය ලැබේවා කියලා මා ප්‍රාර්ථනා කරනවා.

මම ඉන්දිරා පිළිකා භාරයට ස්තූතිය පුද කරනවා. ඉන්දිරා පිළිකා භාරය විසින් මේ කරන ක්‍රියාව මෙ කරන දැනුවත් කිරීම් මේ නගන හඩ විතරක්ම නොවෙයි අපි සියලු දෙනාවත් උනන්දු කරලා මේ යන ගමනට මාගේ ස්තූතිය පුද කරනවා. යැයි නගරාධිපතිනී රෝසී සේනානායක මහත්මිය වැඩිදුරටත් කියා සිටියාය.